MLE ဢဝ်ၵႂၢမ်းပေႃႈမႄႈသွၼ်လိၵ်ႈပၼ်လုၵ်ႈဢွၼ်ႇဢွၼ်တၢင်း

MTP-MLE ဢဝ်ၵႂၢမ်းပေႃႈမႄႈသွၼ်လိၵ်ႈပၼ်လုၵ်ႈဢွၼ်ႇဢွၼ်တၢင်းမၢင်ၵေႃႉၽူႈလဵပ်ႈႁဵၼ်းၶဝ်ဝႃႈ ၶုၼ်သိၵ်းၵျႃး မႃးၽၢၼ်ႇသၢင်းပဵၼ်တႆးၵေႃႈ ယဵၼ်းယဝ်ႉ ၵွပ်ႈဝႃႈ လၢႆးပူၵ်းပွင်လုၵ်ႈဢွၼ်ႇၶဝ် ၽိတ်းဝႆႉ ၼႆယဝ်ႉ။ၶႂ်ႈဝႃႈတႄႉ ႁဝ်းဢဝ်လုၵ်ႈလၢင်းႁဝ်းၼႆႉ ပွႆႇယူႇႁူင်းႁဵၼ်းမၢၼ်ႈၸဵမ်လဵၵ်ႉ ယဝ်ႉ တႃႇတေယဵၼ်းၼၼ်ႉ ႁဝ်းပိုတ်ႇတၢင်းဝႆႉၵူၺ်းႁဝ်း ၸဵမ်လဵၵ်ႉယဝ်ႉ။ ၼႂ်းပိူင် လၢႆးဢဝ်ၵႂၢမ်းငဝ်ႈ(ၵႂၢမ်းပေႃႈမႄႈ)သွၼ်လုၵ်ႈဢွၼ်ႇဢွၼ်တၢင်းၼႆႉ ပေႃးထိုင် ၸၼ်ႉလႂ်ၵွၼ်ႇ ၸင်ႇတေလီသွၼ် ၽႃႇသႃႇတၢင်ႇဢၼ် ၼႆၵေႃႈ မီးဝႆႉယူႇ။ဢမ်ႇၸႂ်ႈဝႃႈ လူဝ်ႇဢဝ်ပွႆႇႁူင်းႁဵၼ်းၸဵမ်လဵၵ်ႉ လူၺ်ႈဢမ်ႇဝူၼ်ႉသင်ၼၼ်ႉၼႆယဝ်ႉ။ ဢၼ်ႁဝ်းယဵၼ်းၼႆႉ ပဵၼ်ၵွပ်ႈ သိုၵ်းမၢၼ်ႈ ဢမ်ႇပၼ်ႁဝ်းသွၼ်လိၵ်ႈလွတ်ႈလႅဝ်းလႆႈသေ ႁဝ်းသမ်ႉ ဢဝ်လုၵ်ႈႁဝ်းႁဵၼ်းႁူႉမေႃ လိၵ်ႈမၢၼ်ႈ တင်းပိုၵ်းၼၼ်ႉယဝ်ႉ။

ၼႂ်းဢၼ်ၵႂၢမ်းလၢတ်ႈၶိူဝ်းၵူၼ်း ၼႂ်းလူၵ်ႈယွမ်းႁၢႆလၢႆၵႂႃႇၼၼ်ႉ ၶဝ်ႈပႃးဝႆႉ လွင်ႈဢမ်ႇဢဝ်ၵႂၢမ်းပေႃႈမႄႈၸႂ်ႉတိုဝ်းသေ သွၼ်ပၼ်ၵၼ်ဢွၼ်တၢင်း ၼႂ်းႁူင်းႁဵၼ်းလႄႈ ၼႂ်းလုမ်းၼႂ်းၸၢႆးၼၼ်ႉၼႆယဝ်ႉ။မၢင်ၵေႃႉသမ်ႉထတ်းႁၼ်ဝႃႈ လုၵ်ႈဢွၼ်ႇၸိူဝ်းယူႇၼႂ်းဝဵင်းသေ လႆႈပၼ်ငိုၼ်းၵႃႈႁဵၼ်း ႁူင်းႁဵၼ်းမၢၼ်ႈၼၼ်ႉ မိူၼ်တင်းသိုဝ်ႉယဵၼ်းဢဝ် ၼႆယဝ်ႉ။ပေႃးယူႇဝၢၼ်ႈၼွၵ်ႈယဝ်ႉ ၶၢႆဢုၵ်ႉၸႃႇပၸ်ႉၸေးသေ ပွႆႇလုၵ်ႈဢွၼ်ႇၵႂႃႇႁဵၼ်းလိၵ်ႈႁူင်းႁဵၼ်းမၢၼ်ႈ ယူႇဢႃႈသွင်ႇၼၼ်ႉ မိူၼ်တင်း ၶၢႆဝူဝ်းသေပွႆႇၵႂၢႆးၵႂႃႇ ႁဵၼ်းလိၵ်ႈ ၼႆၵေႃႈ တေၵႆႉလႆႈငိၼ်းၵၼ်ယူႇ။

လိုၼ်းသုတ်း ဢၼ်ၶႂ်ႈဝႃႈတႄႉ ၵွပ်ႈဝႃႈ ႁဝ်းဢမ်ႇႁူႉဝႃႈ ပေႃးႁဝ်းပွႆႇလုၵ်ႈႁဝ်း ၵႂႃႇႁဵၼ်းၸိူင်ႉၼႆ သွၼ်ၸိူင်ႉၼႆ တေပဵၼ်ႁိုဝ်ၼႆ ဢမ်ႇႁူႉလႄႈ ၵူၺ်းႁူႉဝႃႈ ၵူဝ်လႆႈၼႃႈလဵၵ်ႉ၊ ၵူဝ်ဢမ်ႇမေႃလိၵ်ႈသေ ပွႆႇယူႇႁူင်းႁဵၼ်းၵူၺ်းတႄႉ ဢမ်ႇၸၢင်ႈ ႁၢမ်ႈလႆႈ။ သမ်ႉႁူႉထႅင်ႈဝႃႈ ပေႃးလုၵ်ႈယဝ်ႉႁဵၼ်းယဝ်ႉ ၵႂႃႇႁႃႁဵတ်းၵၢၼ် ႁႂ်ႈလႆႈငိုၼ်းၼမ်ၼမ်ၼႆယဝ်ႉ။ တႃႇတေႁဵတ်းႁႂ်ႈလုၵ်ႈဢွၼ်ႇလီၼၼ်ႉ ဢမ်ႇၵွမ်ႉဝႃႈ ပုၼ်ႈၽွၼ်းမီးတီႈ ပေႃႈမႄႈလႄႈၶူး/မေႃသွၼ်ၵူၺ်း မၼ်းၵဵဝ်ႇပႃး ၵူၼ်းႁိမ်းႁွမ်း ၵူႈၵေႃႉ ၼႂ်းဝဵင်း ၼႂ်းပွၵ်ႉ ၼႂ်းဝၢၼ်ႈယဝ်ႉ။

#ၶုၼ်ၵွၼ်းလၢႆး 16/9/2024